இறைவன் இயேசுவில் அன்புக்குரியவர்களே! இன்றைய நாள் இறைவார்த்தையின் அடிப்படையில் உங்களோடு இணைந்து சிந்திப்பதில் மகிழ்ச்சி அடைகின்றேன் !
இன்றைய நற்செய்தி வாசகத்தில் விபச்சாரத்தில் ஈடுபட்டதாகச் சொல்லி ஒரு பெண்ணை இயேசுவின் முன்னால் நிறுத்தி, மோசேயின் சட்டப்படி இவரை கல்லால் எரிந்து கொல்லலாமா என்ற கேள்வியை எழுப்புகிற போது ஆண்டவர் அடுத்தவரை தீர்ப்பிடுவதற்கு பதிலாக நாம் நேர்மையாளராகவும் நீதியோடும் செயல்பட வேண்டும் என்பதை இலை மறை காயாக எடுத்துரைக்கின்றார். உங்களின் குற்றமில்லாதவர் முதல் கல்லை எரியட்டும் என்ற இயேசுவின் வார்த்தைகள் அங்கிருந்த ஒவ்வொருவரின் உள்ளத்தையும் ஊடுருவியது.
ஒருவரும் தங்கள் வாழ்வை சீர்தூக்கிப் பார்த்து சிறுவர் முதல் பெரியவர் வரை கையில் ஏந்திய கல்லை தரையில் போட்டுவிட்டு நகர்ந்து சென்றார்கள் என விவிலியம் சுட்டிக்காட்டுகிறது.
குற்றம் செய்தார் என்றும், கையும் களவுமாக பிடிபட்டார் என்றும் அவர்கள் கொண்டு வந்து நிறுத்தியது ஒரு பெண்ணை மட்டுமே. ஆணாதிக்க சமுதாயம் தன்னை காத்துக் கொண்டு, ஒரு பெண்ணை மட்டும் குற்றவாளியாக நிறுத்துகின்ற ஒரு நிகழ்வினை அன்று முன்னெடுத்தது. கடவுளின் பார்வையில் அனைவரும் மதிக்கத்தக்கவர்கள். பாலினமோ அல்லது இனத்தின் அடிப்படையிலோ, மதத்தின் அடிப்படையிலோ, மொழியின் அடிப்படையிலோ, நம்மில் பிளவுகள் இல்லை; வேறுபாடுகள் இல்லை என்பதை இயேசு எடுத்துரைக்கும் வண்ணமாக, பிறரை குற்றவாளி என யாரும் தீர்ப்பிடக்கூடாது; இந்த தீர்ப்பிடுதல் என்பது இறைவனுக்கு உரியது என்பதை எடுத்துரைக்கின்றார். இயேசுவிடம் இருந்து நாம் இன்றைய நாள் இறைவார்த்தையின் வழியாக கற்றுக்கொண்ட இந்த தீர்ப்பிடக்கூடாது என்ற பண்பினை இதயத்தில் இருத்திக் கொள்வோம். நாம் வாழுகின்ற சமூகத்தில் மற்றவர்களை குற்றவாளிகள் என தீர்ப்பிடுகிற போதெல்லாம் நாமும் தீர்ப்பிடப்பட்டுக் கொண்டு தான் இருக்கிறோம்; குற்றவாளிகளாக இருந்து கொண்டு தான் இருக்கிறோம் என்பதை இதயத்தில் இருத்தியவர்களாக, நாம் வாழுகின்ற இந்த சமூகத்தில் நம்மால் முடிந்த நன்மைகளை மற்றவருக்குசா செய்யவும் நீதியோடும் நேர்மையோடும், என்றும் பயணிக்கவும் இன்றைய நாளில் அருள் வேண்டுவோம். இறைவன் நம்மை தொடர்ந்து ஆசிர்வதிப்பார்.
