தலைவர்களே....! வணக்கம்.
இன்றைய நாள் இறை வார்த்தையின் அடிப்படையில் என் சிந்தனைகளை உங்களோடு பகிர்வதில் மகிழ்ச்சி அடைகிறேன்.
ஏன் தலைவர்களே என்று உங்களை அழைக்கிறேன் என எண்ணுகிறீர்களா?
மண்ணில் பிறந்த ஒவ்வொரு மனிதனும் தலைமைத்துவப் பண்பினை கொண்ட தலைவர்கள் தான்.
பலர் தாங்கள் ஒரு தலைவர் என்பதை கண்டு பிடித்துக் கொள்கிறார்கள்.
பலர் தாங்கள் தலைவர்களா? என தங்கள் மேலேயே ஐயம் கொள்கிறார்கள்.
பலருக்கு சிலர் நீங்கள் தான் தலைவர் என்பதைச் சுட்டிக் காட்டுகிறார்கள்.
இன்று நிலவும் சூழலில் கூட பலரும் தலைமைப் பொறுப்பை ஏற்பதற்காக நான் உங்களுக்காக இரத்தம் சிந்துகிறேன்.... நான் உங்களுக்காக என்னிடம் இருப்பதை எல்லாம் இழந்துவிடுவேன் என கூறக் கூடியவர்களாக இருக்கிறார்கள். இவர்களுக்கு மத்தியில் இன்று நாம் தலைவர்களுக்கெல்லாம் தலைவரான ஆண்டவர் இயேசு கிறிஸ்துவின் திரு பாடுகளை நினைவு கூருகின்றோம்.
தலைவனுக்கு இருக்க வேண்டிய பண்புகள் என்ன? என்று இன்று உள்ள சூழலில் வலைதளத்தில் தட்டினால் பல தலைமைத்துவ பண்புகளை நாம் காணலாம். தலைமைத்துவ பண்புகள் பல இருந்தாலும் தலைமைத்துவத்திற்கு அடிப்படையானது... தலைமைத்துவ பண்புகளோடு வாழ்ந்து காட்டும் செயல் மட்டுமே.... இதன்படி வாழ்ந்தவரைத் தான் இன்று உலகம் நினைவுகூறுகின்றது.
இயேசு ஒரு நல்ல தலைவரா? என்ற கேள்வியை நம்மில் பலர் எழுப்பலாம். நல்ல தலைவனாக இருந்திருந்தால் ஏன் பலரால் கொலை செய்யப்பட்டிருக்க வேண்டும்... ஒரு நல்ல தலைவன் அனைவரையும் அரவணைத்துச் செல்லக் கூடியவனாக தானே இருக்க முடியும்? அப்படி அனைவரையும் அரவணைத்துச் செல்லக் கூடிய தலைமைத்துவ பண்பை கொண்டிருந்தால் இவர் ஏன் பலருக்கு எதிரியாக இருக்கக் கூடிய சூழல் உருவானது? என்ற கேள்விக் கணைகள் நம் உள்ளத்தில் ஆயிரம் முறை எழுந்து கொண்டே இருந்தாலும் அதற்கு விடையைத் தேட வேண்டிய நேரம் தான் இன்றைய நாள்...
இயேசு மண்ணில் வாழ்ந்த போது சட்டத்தால் ஒருவரை அடிமை படுத்துவது தவறு என்றார்.எனவே சட்டத்தை பிடித்துக்கொண்டிருந்த பரிசேயர்களுக்கு அவர் எதிர்ப்பாளராக மாறினார்.
ஆண்டவரின் ஆலயம் அனைவருக்கும் பொதுவானது என்பதை மறுத்து, அங்கு உயர்வு, தாழ்வு பின்பற்றுவதை சாடினார். எனவே சதுசேயர்களுக்கு எதிர்ப்பாளராக மாறினார்.
மக்களிடம் அதிக வரி வசூலிப்பது ஆட்சியாளருக்கு உகந்த செயல் அல்ல என்பதைச் சுட்டிக் காண்பித்தார் ஆட்சியாளர்களுக்கு எதிர்ப்பாளராக மாறினார்.
மனிதனாக பிறந்த ஒவ்வொருவரும் மதிக்கப்பட வேண்டியவர்கள். நம்மிடையே யூதர்... கிரேக்கர்... சமாரியர்... என்ற பாகுபாடு கூடாது என்று கூறியதன் விளைவு தன் இன மக்களுக்கு எதிர்ப்பாளராக மாறினார்.
சமாரியர்கள் என்றால் தீண்டத்தகாதவர்கள்...அவர்களைத் தொடக்கூடாது, அவர்களோடு உரையாட கூடாது, அவர்கள் இருக்கும் பகுதிக்குக் கூட நாம் செல்லக்கூடாது. எனவே வாருங்கள் நாம் பல மைல் தூரம் கடந்து எருசலேம் தேவாலயத்தை சென்றடைவோம் என்ற நோக்கத்தோடு செயல்பட்டவர்களுக்கு மத்தியில் சமாரியர்களை சந்தித்து அவர்களோடு உண்டு, அவர்களோடு உரையாடியதன் விளைவு... சமூகப் போராளி என சமூகத்தின் எதிர்ப்பாளராக மாறினார்.
இப்படி பலருக்கு எதிர்ப்பாளராக மாறியதன் விளைவு தான் இன்று தலை சிறந்த தலைவனாக நீனைக்கப்படுகிறார். எப்படியும் வாழலாம் என்பவர்களுக்கு மத்தியில் இப்படித்தான் வாழ வேண்டும் என வாழ்ந்து காட்டியவர் இந்த இயேசு ...
தலைமைத்துவ பொறுப்பை ஏற்பதற்கு முன்பாக... நான் தலைவனாக ஆட்சியில் அமர்ந்தால்
நான் அனைத்தையும் மாற்றி விடுவேன்... என வெறும் வெற்று வார்த்தைகளால் பலரின் உள்ளங்களை கவருபவர்களுக்கு மத்தியில் தன்னுடைய வாழ்வால் அனைவரின் உள்ளத்தையும் கவர்ந்தவர் தான் இந்த இயேசு.
தலைவன் என்பவன் முதன்மையான இடத்தையும் ஆட்சியையும் அதிகாரத்தையும் தேடுபவன் அல்ல மாறாக தன் செயலில் மனித சமூகத்திற்கு வாழ்க்கை பாடத்தை கற்பிப்பவனாக இருக்க வேண்டும்.
இதோ இன்றைய நாளில் நாம் வாசித்த வாசகங்கள் அனைத்தும் நமக்கு இயேசுவின் வாழ்விலிருந்து வாழ்க்கை பாடத்தை கற்பிக்கிறது.
உங்களுள் முதன்மையானவராக இருக்க விரும்புகிறவர்... அனைவருக்கும் பணியாளனாகட்டும் என்ற ஆண்டவரின் வார்த்தைகள் வெறும் வார்த்தைகள் அல்ல அது செயல்வடிவம் பெற்றது இன்று இயேசு தம் சீடர்களின் காலடிகளைக் கழுவிய போது....
சென்ற இடமெல்லாம் நன்மை செய்துகொண்டே சென்றார் இயேசுகிறிஸ்து என்ற வார்த்தைகளுக்கு ஏற்ப இன்று தலைவர்களுள் பெரும்பாலும் பலர் தன்னுடன் இருப்பவர்கள் எல்லாம் தன்னைப் போலத்தான் இருக்க வேண்டும் என எண்ணி வாழ்கிறார்கள்.ஆனால் இவர்களுக்கு மத்தியில் இயேசு தன்னைக் காட்டிக் கொடுப்பவன், மறுதலிப்பவன், தன்னை விட்டுவிட்டு ஓடுபவன் என அனைவரையும் தன் நண்பர்கள் என எண்ணியவராய்... அவர்களை பற்றி முழுதாக அறிந்திருந்தும் அவர்களோடு அமர்ந்து உணவருந்துகிறார்,தன்னிடம் இருப்பதை அவர்களோடு பகிர்ந்து கொள்கிறார்... ஏன் தன்னையே பகிர்ந்தார் என்பதுதான் முற்றிலும் உண்மை...இதனை இயேசுவின் இறுதி இராவுணவில் உணரலாம்.
தம்மிடம் இருப்பதில் பகிரும் பகிர்வாளர்களுக்கு மத்தியில் இருப்பதையே பகிர்ந்த இயேசுவின் செயல்பாட்டை கல்வாரி சிலுவையில் இருந்து உணரலாம் ....
சொல்லிவிட்டு செய்ய மறந்த தலைவர்களுக்கு மத்தியில் சொல்லுவதை எல்லாம் தன் செயலில் வெளிக்காட்டிய தலைவன் தான் இன்று நாம் நினைவுகூறும் இந்த இயேசு கிறிஸ்து... இவரைப் பின்பற்றி இவரைப் போல வாழ வேண்டும் என எண்ணம் கொண்டவர்களாகிய நாம் அனைவரும் எண்ணங்களால் வாழ்வதல்ல வாழ்க்கை. நமது வாழ்வால் இயேசுவை வெளிக்காட்ட வேண்டிய கடமை கொண்டவர்களாக இருக்கிறோம்.
அறிந்தோ அறியாமலோ பிறப்பின் மூலமாக கிறிஸ்தவ மதத்தை தழுவிய நாம் அனைவரும் நாங்கள் அனைவரும் கிறிஸ்துவின் சாட்சிகள் எங்கள் தலைவனை போல் வேறு தலைவன் இல்லை என மார்தட்டிக் கொண்டு இருப்பதற்காக அல்ல இவ்வாழ்வு ...முன்மாதிரியான, எடுத்துக்காட்டாக இயேசுவின் வாழ்வை போன்ற ஒரு சாட்சிய வாழ்வாக நமது வாழ்வு இருக்க வேண்டும்.
போலியான தலைவர்களின் வெற்று வார்த்தைகளை நம்பி பயணிப்பதை நிறுத்திவிட்டு உண்மையான தலைவனின் அடிச்சுவட்டில் அனுதினமும் அடி எடுத்து வைக்கக்கூடிய சாட்சிய வாழ்வு வாழ இயேசுவின் பாடுகள் வழி வாழ்க்கைப் பாடம் கற்றிட முயல்வோம்....
