ஆண்டவருக்கு உகந்த வாழ்வை நமது வாழ்வாக்கிக் கொள்ள....8-8-22
இறைவன் இயேசுவில் அன்புக்குரியவர்களே!
இன்றைய நாள் இறைவார்த்தையின் அடிப்படையில் உங்களோடு இணைந்து சிந்திப்பதில் மகிழ்ச்சி அடைகிறேன்!
இன்றைய நாள் வாசகங்களின் அடிப்படையில், நாம் நமது வாழ்வை சீர்தூக்கிப் பார்க்க அழைக்கப்படுகிறோம்.
ஆண்டவர் இயேசு கிறிஸ்து இந்த மண்ணில் வாழ்ந்த போது பலவிதமான பணிகளை செய்து கொண்டே சென்றார். அவர் பின்னே அவரை பின்தொடர்ந்த கூட்டத்தினர், அவரின் மீது ஏதாவது ஒரு குறையை கண்டுபிடிக்க வேண்டும் என்ற மனநிலையோடு, குற்றம் சுமத்த வேண்டும் என்ற மனநிலையோடு அவரை பின்தொடர்ந்து கொண்டிருந்தார்கள்.
தம்மை பின் தொடர்கின்ற நபர்கள் எல்லாம் இத்தகைய மனநிலை கொண்டிருந்தார்கள் என அறிந்திருந்த நிலையிலும் அவர் செய்ய விரும்பிய நன்மைகளை செய்து கொண்டே சென்றார் என்பதை இன்றைய வாசகங்கள் வழியாக நாம் உணர்ந்து கொள்ள அழைக்கப்படுகின்றோம்.
யூதச் சமூகத்தில் பலவிதமான வரிகளானது விதிக்கப்பட்டிருந்தது. உரோமையரின் ஆட்சிக்கு உட்பட்டிருந்த யூதர்கள், பல வழிகளில் வழிகளை செலுத்திக் கொண்டிருந்தார்கள். இந்த வரிகளை இயேசு செலுத்துகிறாரா? இல்லையா? என்பது குறித்து கேள்வியை எழுப்பி, இயேசுவை சிக்க வைக்க வேண்டும் என்ற மனநிலையோடு உடன் இருந்தவர்கள் செயல்பட்டார்கள். ஆனால் இறைவன் விவேகத்தோடு அவர்களை எதிர்கொண்டதை குறித்து, இன்றைய நாளில் நாம் வாசிக்க கேட்டோம்.
இந்த நற்செய்தி பகுதியை நமது வாழ்வோடு நாம் ஒப்பிட்டு பார்க்கிற போது, நாம் வாழ்கின்ற சமூகத்தில் பலவிதமான தடைகளையும், பலவிதமான சூழ்ச்சிகளையும், சந்திக்கின்ற போதெல்லாம், துணிவோடு, கடவுளின் துணையோடு அனைத்தையும் எதிர்கொண்டு செல்ல, ஆண்டவருக்கு உகந்த ஒரு வாழ்வை வாழ, கடமையை உணர்ந்து செயல்படக்கூடிய மனிதர்களாக, செல்லுகின்ற இடமெல்லாம் நன்மை செய்து கொண்டே செல்ல இறைவன் இன்றைய நாளில் அழைப்பு தருகிறார்.
இறைவன் தருகின்ற அழைப்பை இதயத்தில் ஏற்றுக்கொண்டு, ஆண்டவருக்கு உகந்த வாழ்வை நமது வாழ்வாக்கிக் கொள்ள, இறையருள் வேண்டுவோம். இறைவன் நம்மை தொடர்ந்து ஆசிர்வதிப்பார்.
கருத்துகள் இல்லை:
கருத்துரையிடுக