இறைவன் இயேசுவில் அன்புக்குரியவர்களே! இன்றைய நாள் இறை வார்த்தையின் அடிப்படையில் உங்களோடு இணைந்து சிந்திப்பதில் மகிழ்ச்சி அடைகின்றேன்!
இயேசுவை அறிந்து கொண்ட சீடர்கள் தாங்கள் அறிந்த இயேசுவைப் பற்றி அடுத்தவருக்கு அறிவித்து, அதன் அடிப்படையில் மற்றவரையும் இயேசுவை நோக்கி அழைத்து வருவதைத் தான் இன்றைய நற்செய்தி வாசகமாக நாம் வாசிக்க கேட்கின்றோம்.
நத்தானியேலை அழைத்து வருகிறார்கள். இந்த நத்தானியலை குறித்து ஆண்டவர் இயேசு கிறிஸ்து கூறக்கூடிய வார்த்தைகளை கண்டு நத்தானியல் ஆச்சரியப்படுகிறார். ஆனால் ஆண்டவர், இவற்றை சொல்லுவதனால் நீ என்னை நம்புகிறாயா? இதையும் விட இன்னும் மேலானவற்றை நீ காண்பாய் என்று சொல்லி, நத்தானியேலை தன் பணிக்கென இயேசு ஏற்றுக் கொள்வதை இன்றைய நற்செய்தி வாசகத்தின் வாயிலாக நாம் உணர்ந்து கொள்கிறோம்.
நாம் அறிந்திருக்கின்ற இயேசுவை எதன் அடிப்படையில் நாம் அறிந்திருக்கிறோம்? ஏற்றுக் கொண்டிருக்கிறோம் என்ற கேள்வியை நமக்குள்ளாக எழுப்பி பார்ப்போம். அறியாத நேரத்தில், இன்னல்களும் இடையூறுகளும் சந்தித்தபோது இந்த இறைவனின் உடன் இருப்பை உணர்ந்தவர்களாக இந்த இறைவன் மீது நம்பிக்கை கொண்டிருந்தாலும் கூட, இந்த இறைவன் நம்மை ஒவ்வொரு நாளும் கரம் பிடித்து வழிநடத்தக் கூடியவராக இருக்கிறார். நமது வாழ்வில் நாம் காணும் வகையில் மென்மேலும் பலவிதமான அதிசயங்களையும் அற்புதங்களையும் செய்ய வல்லவர் இந்த ஆண்டவர் என்பதை உணர்ந்தவர்களாக ஒவ்வொரு நாளும் இந்த ஆண்டவரை தேடிச் செல்லுகின்ற மனிதர்களாக நத்தானியேலைப் போல நீங்களும் நானும் இருப்பதற்கான ஆற்றலை வேண்டி இன்றைய நாளில் இறைவேண்டல் செய்வோம். இறைவன் தொடர்ந்து நம்மை ஆசிர்வதிப்பார்.
கருத்துகள் இல்லை:
கருத்துரையிடுக