இறைவன் இயேசுவில் அன்புக்குரியவர்களே!
உங்கள் அனைவருக்கும் புத்தாண்டு வாழ்த்துக்களை மகிழ்ச்சியோடு உரித்தாக்குகிறேன்!
கடந்த வருடம் முழுவதுமாக எத்தனையோ நன்மைகளை செய்த கடவுள், புதிய வருடத்தை நமக்கு தந்திருக்கிறார். இந்த நல்ல நாளிலே கடவுளுக்கு நாம் நன்றி செலுத்துவோம். எப்படி ஆண்டவர் இயேசுவின் பிறப்புச் செய்தி இடையர்களுக்கு அறிவிக்கப்பட்டபோது மகிழ்ச்சியோடு அந்த செய்தியை ஏற்றுக்கொண்டு இயேசுவைக் காணச் சென்று, கண்ட இயேசுவை மற்றவர்களுக்கு அறிவித்தார்களோ, அதுபோல கடந்த வருடம் முழுவதுமாக கடவுள் நமக்கு செய்த எல்லா விதமான நன்மைகளையும் நன்றியோடு நினைவு கூர்ந்து நன்றி சொல்லி அவர் தந்திருக்கின்ற இந்த புதிய வருடத்தில் அவருக்கு உகந்த மனிதர்களாக, அவரது வார்த்தைகளை இதயத்தில் இருத்தியவர்களாக, பிறந்து இருக்கின்ற பாலன் இயேசு நமக்கு மகிழ்வைத் தருவார், அந்த மகிழ்ச்சியை ஒவ்வொரு நாளும் கண்டு கொள்ளுகின்ற மனிதர்களாக, மகிழ்வோடு ஒருவர் மற்றவரோடு இணைந்து வாழ்வதற்காக இந்த புதிய வருடம் முழுவதும் நாம் முயற்சிக்க அழைக்கப்படுகிறோம்.
இந்த புதிய வருடத்தில் பழைய சிந்தனைகளை எல்லாம் கடந்து எறிந்தவர்களாக நம் வாழ்வில் இருந்த ஏற்ற இறக்கங்களை எல்லாம் எண்ணி வருந்துவதை விட்டு விட்டு, இந்தப் புதிய வருடத்திலிருந்து புதிய முயற்சிகளை எடுக்கக்கூடியவர்களாக நாளும் ஆண்டவரின் வார்த்தைகளை ஆழமாக வாசிக்கவும், வாசிக்கின்ற வார்த்தைகளை நமது வாழ்வாக மாற்றிக் கொள்ளவும் இன்றைய நாளில் இறைவனிடத்தில் அருள் வேண்டுவோம். இந்த இறைவன் இந்த வருடம் முழுவதும் நம்மைத் தொடர்ந்து ஆசிர்வதிப்பாராக.
கருத்துகள் இல்லை:
கருத்துரையிடுக