நாமும் அவரின் சகோதர சகோதரிகளாக மாறலாம்!
இறைவன் இயேசுவில் அன்புக்கு உரியவர்களே! இன்றைய நாள் இறைவார்த்தையின் அடிப்படையில் என் சிந்தனைகளை உங்களோடு பகிர்வதில் மகிழ்ச்சி அடைகிறேன்.
இன்றைய நாள் வாசகங்கள் நம்மை ஆண்டவர் இயேசுவின் சகோதர சகோதரிகளாக மாறுவதற்கு அழைப்பு தருகின்றன. நாம் ஆண்டவரின் சகோதர சகோதரிகளாக மாறவேண்டும் என்றால், கடவுளின் திருவுளத்தை நிறைவேற்றக் கூடியவர்களாக நாம் இருக்க வேண்டும். கடவுளின் திருவுளத்தை நிறைவேற்றியவர் தான் அன்னை மரியா. ஆண்டவருடைய தூதர் அறிவித்த செய்தியை ஏற்றுக்கொண்டு, அந்த தூதரின் வார்த்தைகளுக்கு இணங்கி, ஆண்டவர் இயேசுவை தன் வயிற்றில் சுமக்க, தம்மையே கையளித்து ஆண்டவரின் திருவுளத்தை நிறைவேற்றிய அன்னை மரியாவைப் போல, நாமும் நமது வாழ்வில், ஆண்டவரின் திருவுளத்தை நிறைவேற்றி அவரது சகோதர சகோதரிகளாக மாறிட முடியும். ஆண்டவருடைய சகோதர சகோதரிகளாக நாம் மாற வேண்டுமென்றால், அவரது திருவுளமான இறையாட்சியை இம்மண்ணில் மலரச் செய்ய வேண்டும். அன்போடும் பரிவோடும் இரக்கத்தோடும் அருகில் இருப்பவரை நோக்குகின்ற போது, ஆண்டவர் இயேசுவின் இறையாட்சியை இம்மண்ணில் மலரச் செய்ய நாம் காரணமாக மாறுகின்றோம். நம்மால் இந்த மண்ணில் இறையாட்சி மலருகின்ற போது, நாம் கடவுளின் திருவுளத்தை நிறைவேற்றக் கூடிய நபர்களாக விளங்க முடியும். அவ்வாறு விளங்கினால் நாம் அவரின் சகோதர சகோதரிகளாக மாறலாம். ஆண்டவர் நம்மை அவருடைய சகோதரர் சகோதரிகளாக எண்ணுவதால் தான், நம்முடைய அனைத்து விதமான இன்ப துன்ப நேரங்களில், நம்மோடு அவர் பயணிக்கின்றார். அவரது திருவுள்ளத்தை நாம் உணர்ந்து கொள்ள வேண்டும், அதன்படி செயல்பட வேண்டும் என்ற எண்ணத்தோடு நம்மோடு ஒவ்வொரு நாளும் ஒவ்வொரு நிமிடமும் பயணிக்கின்றார்.
அவ்வாறு தான் இஸ்ரயேல் மக்களின் துன்பத்தை கண்டு அவர்களின் அழுகுரலை கேட்டு, அவர்களை அந்த அடிமைத்தனத்திலிருந்து மீட்டு வர மோசேயை அனுப்பி, அந்த மோசே வழியாக அவர்களுக்கு விடுதலை கொடுத்து பாலும் தேனும் பொழியும் கானான் தேசத்தை நோக்கி நடத்திச் சென்ற பொழுதும் கூட பலவிதமான இன்னல்களையும், பலவிதமான சிக்கல்களையும் அவர்கள் சந்தித்த போது, அவர்களோடு இருந்து அவர்களுடைய இன்ப துன்பத்தில் பங்கெடுத்து, அவர்களை மீட்டு வந்தார். கடவுள் தம்மை மீட்டு வந்தார் என்பதனை மனதில் கொண்டவர்களாய், மோசேயோடு இணைந்து அவர்கள் புகழ் பாடல் பாடினார்கள் என முதல் வாசகத்தில் வாசிக்கக் கேட்டோம். நாம் ஆண்டவரை புகழ் பாடலால் மகிழ்விப்பதை விட, இறையாட்சியின் மதிப்பீடுகளான அன்பு, சமத்துவம், சகோதரத்துவத்தோடு இந்த சமூகத்தில் பயணம் செய்து, ஆண்டவரின் திருவுளத்தை இம்மண்ணில் நிறைவேற்றக் கூடியவர்களாக மாறிட, அவரது சகோதர சகோதரிகளாக மாறிட, இன்றைய நாளில் அழைக்கப்படுகின்றோம். ஆண்டவர் தருகின்றன அழைப்பை உணர்ந்து கொண்டு, அவரின் சகோதர சகோதரிகளாக மாறிட, முயலுவோமா!
கருத்துகள் இல்லை:
கருத்துரையிடுக