நேர்மையாளராக ஒளி வீசிட...
இறைவன் இயேசுவில் அன்புக்குரியவர்களே! இன்றைய நாள் இறைவார்த்தையின் அடிப்படையில் என் சிந்தனைகளை உங்களோடு பகிர்வதில் மகிழ்ச்சி அடைகிறேன்.
இன்றைய நாள் வாசகங்கள் அனைத்தும், நேர்மையாளராக, ஒளி வீசக் கூடிய மக்களாக நாம் இச்சமூகத்தில் திகழ வேண்டும் என்ற செய்தியை நமக்கு எடுத்துரைக்கின்றன. ஆண்டவர் இயேசு விரும்பக்கூடிய ஒளிவீசக் கூடியவர்களாக நாம் இவ்வுலகத்தில் இருக்க வேண்டுமாயின் நாம் ஆண்டவரை தேடிச் செல்ல வேண்டும். எப்படி மோசே ஆண்டவரை தேடிச் சென்றபோது, ஆண்டவர் அவரோடு உரையாடினாரோ அதுபோல, நாமும் அவரை தேடிச் செல்லவேண்டும். தேடிச் செல்வது மட்டும் போதுமானது அல்ல. தேடிச்செல்லக் கூடிய ஆண்டவரிடம் நாம் தெளிவுகளை பெற்றுக்கொள்ளவேண்டும்.
இன்றைய நற்செய்தி வாசகத்தில் எப்படி சீடர்கள் களைகள் உவமையை பற்றி விளக்குங்கள் என்று ஆண்டவரிடம் கேட்டு தெளிவுகளை பெற்றுக் கொண்டார்களோ அதுபோல, நாமும் ஆண்டவரை தேடிச் சென்று அவரிடம் தெளிவுகளை கேட்டுத் தெரிந்து கொள்ள, இன்றைய நாள் அழைப்பு தருகிறது. இவை இரண்டையும் நாம் சரியாக செய்கின்ற பொழுது, நாம் இந்த சமூகத்தில் ஆண்டவர் இயேசு விரும்பக்கூடிய நேர்மையாளராக, ஒளி வீசக் கூடிய மக்களாக வாழ முடியும் என்ற செய்திதான் இன்றைய நாளில் மையமாக அமைகிறது.
வாழ்க்கையில் பரபரப்பான இந்த உலகத்தில், அனுதினமும் பல பணிகளுக்கு மத்தியில் பம்பரமாக சுழன்று கொண்டிருக்க கூடிய நமக்கு, இன்று ஆண்டவரை தேடிச் செல்வது என்பது ஒரு சவாலாகத்தான் இருக்கிறது. இந்த சவாலான சூழ்நிலையில், நாம் ஆண்டவரை கண்டுகொள்ளவும், அவருக்கென நேரம் ஒதுக்கவும், அவரைத் தேடிச் செல்லவும், அவரிடம் அமர்ந்து தெளிவுகளை பெற்றுக்கொள்ளவும், இன்றைய நாளில் இறைவன் அழைப்பு தருகின்றார்.
இறைவனது குரலை உணர்ந்து கொண்டவர்களாய், நாம் நமது வாழ்வில் எவ்வளவோ பணிகள் இருந்தாலும், பணிகளுக்கு மத்தியில் ஆண்டவருக்காக நேரத்தை ஒதுக்குவோம். அவரைத் தேடிச் செல்வோம். இயேசுவின் சீடர்களை போல ஆண்டவர் இயேசுவிடமிருந்து தெளிவுகளை பெற்றுக் கொண்டு, நமது வாழ்க்கையை நேர்மையான மனிதர்களாகவும், இச்சமூகத்தில் ஒளி வீசக்கூடிய மனிதர்களாகவும் மாறிட, இறை அருளை இணைந்து வேண்டுவோம்.
கருத்துகள் இல்லை:
கருத்துரையிடுக