இயேசுவை நோக்கி நமது வாழ்வை அமைத்துக் கொள்ள...
ஆசை யாரை விடும்? அது அனைவர் மனதிலும் வேரை விடும் என்று கூறுவார்கள்.
மரமானது நீரை நோக்கி தனது வேர்களை விடுவது போல நாம் நமது வாழ்வில் உயிரோடு எழுப்பப்பட்ட ஆண்டவர் இயேசு கிறிஸ்துவை நோக்கி நமது வேர்களை விட அழைக்கப்படுகின்றோம்.
ஆண்டவர் இயேசுகிறிஸ்துவை நோக்கி நமது வாழ்வின் வேர்களை விட வேண்டும் என்றால் அவர் கற்பித்தவைகளை நமது வாழ்வாக நாம் மாற்றவேண்டும்.
ஏழைகளை அன்பு செய்வதும் சமூகத்தில் புறக்கணிக்கப்பட்டவர்களின் சார்பாக நிற்பதும் சிறையில் அடைக்கப்பட்டோருக்கு அதரவாக இருப்பதும் தேவையில் இருப்பவர்களுக்கு உதவக் கூடியவர்களாக இருப்பதும் தான் ஆண்டவர் விரும்பக்கூடிய இறையாட்சியின் மதிப்பீடுகளாகும்.
இந்த இறையாட்சியின் மதிப்பீடுகள் அன்பு, இரக்கம், அமைதி, நீதி, பகிர்வு என பலவற்றை இந்த சமூகத்தில் மலரச் செய்யும். இதனை மலரச் செய்யக் கூடியவர்களாக நாம் இருக்கும்போது ஆண்டவர் இயேசுவை நோக்கி வேர்களை விடக் கூடியவர்களாக நாம் இருப்போம்.
நமது வேர்கள் கிறிஸ்துவை நோக்கி மையப்படுத்தியதாக இருக்க வேண்டுமே தவிர நமது உள்ளத்தின் ஆசைகளை மையப்படுத்தியதாக இருத்தலாகாது. நாம் இன்றைய நாளில் ஆண்டவர் இயேசுவை நோக்கி நமது வாழ்வை அமைத்துக் கொள்ளக் கூடியவர்களாகிட இறை அருள் வேண்டுவோம்.
கருத்துகள் இல்லை:
கருத்துரையிடுக