இயேசுவுக்கு உகந்த வாழ்வு...
சமையலில் உப்பு மிகவும் அவசியமான ஒன்று. உப்பில்லா பண்டம் குப்பையிலே என்று கூறுவார்கள்.உணவை அருமையாக சமைத்து அதில் உப்பை இடவில்லை என்றால் அது பயனற்றதாகிவிடும்.
உப்பு சமையலில் தன்னை பெரிதாக காட்டிக் கொள்வதில்லை.ஆனால் அது தவிர்க்கப்பட முடியாத ஒன்றாக இருக்கிறது. அதுபோல இயேசுவை பின்பற்றக்கூடிய நமது வாழ்விலும் பல உப்புக்கள் தவிர்க்கப்பட முடியாதவையாக இருக்க வேண்டும்.
அவைகளில் ஒன்றுதான் அர்ப்பணிப்பு. நம்மிடம் இருப்பதை அடுத்தவரோடு பகிர்ந்து கொள்வதற்கான மனம், தியாக உள்ளம், அர்ப்பணிப்பு மனப்பான்மை நம்மிடத்தில் இருத்தல் வேண்டும். அந்த அர்ப்பணிப்பு நம்மை ஆண்டவர் இயேசுவின் சீடர் ஆக்கும். பலன் கருதாது பணி செய்யத் தூண்டும்.
மன்னிப்பு வாழ்வில் அவசியமான ஒன்று. இந்த மன்னிப்பு அடுத்தவரை பாவத்தில் விழச் செய்யாது தடுக்கும். நமக்கு எதிராக தீங்கு செய்தவரை கூட மீண்டும் அந்த தவற்றை செய்ய விடாது தடுக்கக்கூடிய கருவியாக இருக்கும். இந்த மன்னிப்பு வாழ்வில் அவசியமான ஒன்றாகிறது.
உப்பு உணவில் மட்டுமல்ல வாழ்விலும் அவசியம். அர்ப்பணிப்பும் மன்னிப்பும் வாழ்வில் இருக்கும் பொழுது நமது வாழ்வு அர்த்தமுள்ள வாழ்வாக, ஆண்டவர் இயேசுவுக்கு உகந்த வாழ்வாக இருக்கும். அத்தகைய வாழ்வை நாம் உரிமையாக்கிக் கொள்ள இறையருள் வேண்டுவோம்.
கருத்துகள் இல்லை:
கருத்துரையிடுக