எவரை முன்னிறுத்துவது?
இறைவன் இயேசுவில் அன்புக்குரியவர்களே!
இன்றைய நாள் இறைவார்த்தையின் அடிப்படையில் என் சிந்தனைகளை உங்களோடு பகிர்வதில் மட்டற்ற மகிழ்ச்சி அடைகிறேன்.
இன்று தாய்த் திருஅவையாக நாம் அனைவரும் இணைந்து ஆண்டவர் இயேசுவின் உயிர்ப்புக்கு சாட்சிகளாக விளங்கிக் கொண்டிருக்கிறோம். இன்றைய முதல் வாசகத்தில் பேதுரு தன்னால் குணம் பெற்ற ஒருவனைப் பார்த்து, இவர் என்னால் குணம் பெறவில்லை. இயேசு என்ற வார்த்தையினால் குணம் பெற்றார். நாங்கள் பெரிதாக எதையும் செய்யவில்லை. இயேசு என்ற வல்லமை தான் அனைத்தையும் செய்தது என இயேசுவை முன்னிறுத்தி தனது பணியை செய்கின்ற செயலை இன்று நாம் காணுகின்றோம்.
நாம் வாழும் இந்த உலகத்தில் வெறுமனவே வெற்று தம்பட்டம் அடிக்கக் கூடிய மனிதர்களுக்கு மத்தியில் நாம் எப்படி வாழ வேண்டும் என்பதனை மிகவும் அழகாக தெளிவாக பேதுரு தன் வாழ்வு மூலம் வெளிப்படுத்துகிறார். இதையே இன்றைய வாசகங்களில் நாம் வாசிக்க கேட்கிறோம். இன்றைய நற்செய்தி வாசகத்திலும் கூட இயேசு தன் உயிர்ப்பை சீடர்களுக்கு வெளிப்படுத்துகிறார். அவர்களின் கலக்கத்தை போக்குகிறார். அவர்களின் அச்சத்தை நீக்குகிறார். கிறிஸ்துவின் உயிர்ப்பில் நம்பிக்கை கொண்ட ஒவ்வொருவரும் மனம் மாறுகிறார்கள்.
இன்று நாமும் மனமாரத் தான் அழைக்கப்படுகிறோம். மனமாற்றம் பொதுவாகவே எல்லோரும் பல நேரங்களில் பேசக் கூடிய ஒன்றுதான். எத்தகைய மன மாற்றம் தேவை என்பதைத் தான் இன்றைய முதல் வாசகம் விளக்குகிறது. எதை செய்தாலும் தனக்கே பெருமை என பெருமையைத் தேடி ஓடுவதை நிறுத்திவிட்டு, பெயரைம் புகழையும் தேடி ஓடுவதை நிறுத்திவிட்டு, ஆண்டவரை முன்னுரிமைப்படுத்தி, முதன்மைப்படுத்தி, நலமான நல்ல பணிகளைச் செய்யவும் அப்பணிகள் வழியாக நாம் ஆண்டவர் இயேசுவின் சீடர்கள் என்பதையும் வெளிக்காட்டக் கூடியவர்களாக வாழ புத்துணர்வு பெற்று மனமாற்றம் அடையக் கூடியவர்களாக இருக்க இன்று அழைக்கப்படுகிறோம். நமது மனமாற்றம் வார்த்தை அல்ல அது செயலாக்கப்பட வேண்டும். பேதுருவைப் போல எதை செய்தாலும், இயேசு கிறிஸ்துவை முன்னிறுத்திச் செய்ய நாம் இன்றைய நாளில் உள்ளத்தில் உறுதி ஏற்றவர்களாய் தொடர்ந்து பயணிப்போம்.
கருத்துகள் இல்லை:
கருத்துரையிடுக