வார்த்தைகள் உயிருள்ளவை...
இறைவன் இயேசுவில் அன்புக்குரியவர்களே இன்றைய நாள் இறைவார்த்தையின் அடிப்படையில் என் சிந்தனைகளை பகிர்வதில் மகிழ்ச்சியடைகிறேன்.
இறைவனது வார்த்தைகள் உயிருள்ளவை. ஆற்றல் வாய்ந்தவை. எந்த பக்கமும் வெட்டக்கூடிய இருபுறமும் கூரான வாள் போன்றவை.
கடவுளுடைய வார்த்தை உயிருள்ளது, ஆற்றல் வாய்ந்தது; இருபக்கமும் வெட்டக்கூடிய எந்த வாளினும் கூர்மையானது; ஆன்மாவையும் ஆவியையும் பிரிக்கும் அளவுக்குக் குத்தி ஊடுருவுகிறது; எலும்பு மூட்டையும் மச்சையையும் அவ்வாறே ஊடுருவுகிறது; உள்ளத்தின் சிந்தனைகளையும் நோக்கங்களையும் சீர்தூக்கிப் பார்க்கிறது.
எபிரேயர் 4:12
இந்த இறைவார்த்தையினை இயேசு கிறிஸ்து எடுத்து வாசித்த போது அவரது பணியானது என்ன என்பதைக் கண்டுகொண்டார். ஏழைகளுக்கு நற்செய்தியும், சிறைப்பட்டோருக்கு விடுதலையும், பார்வையற்றோருக்கு பார்வையும் என அவரது பணி இந்த சமூகத்தில் எது? என்பதை உணர்ந்து கொள்ள அவருக்கு வழிகாட்டிய வகையில் அமைந்தது எசாயாவின் சுருளேடு. நாம் நமது கையில் வைத்திருக்கும் திருவிவிலியத்தை ஒவ்வொரு நாளும் எடுத்து வாசிக்கும் பொழுது, நமது வாழ்வின் நோக்கத்தையும் பணியையும் நாம் கண்டுகொள்ள முடியும். நாம் அனைவரும் ஆண்டவர் இயேசுவோடு இணைந்திருக்கிறோம். அந்த இயேசு இவ்வுலகத்தில் நம்மோடு வார்த்தையின் வடிவில் இருக்கிறார். அவரது வார்த்தைகள் நமது வாழ்வோடு பின்னிப் பிணைந்தவையாக இருக்க வேண்டும். உடல் உறுப்புகள் இணைந்து இருப்பது போல ஆண்டவரின் வார்த்தைகள் நம்மோடு இணைந்து இருக்க வேண்டும். அவரது வார்த்தைகள் நமது வாழ்வில் செயலாக்கப்பட வேண்டும். அவ்வாறு இருப்போமாயின், நாம் இறைவன் இயேசுவுக்கு உரியவர்களாக அவரது இறையாட்சியின் மதிப்பீடுகளின்படி வாழ்பவர்களாக இச்சமூகத்தில் இருக்க முடியும். எஸ்ரா ஆண்டவரின் வார்த்தைகளை வாசித்தது போல, நாமும் ஒவ்வொரு நாளும் ஆண்டவரின் வார்த்தையை நமது குடும்பத்தில் வாசிக்கவும், சிறுவர் பெரியோர் என ஒவ்வொருவரையும் வாசிக்க ஊக்கமூட்டவும், அவ்வாறு இறைவனது வார்த்தைகளை வாசிப்பதன் வழி, இந்த சமூகத்தில் நாம் செய்ய வேண்டிய பணி எது? என்பதை கண்டு கொண்டு அதனை செயலாக்கிடவும் இறைவன் இன்றைய நாளில் அழைக்கின்றார். அழைக்கும் இறைவனுக்கு கொடுப்போம்.
🛐🛐🛐🛐🛐
பதிலளிநீக்கு