இறைவனது திட்டத்தை கண்டுகொள்ள...
இறைவன் இயேசுவில் அன்புக்குரியவர்களே! இன்றைய நாள் இறைவார்த்தையின் அடிப்படையில் என் சிந்தனைகளை உங்களோடு பகிர்வதில் மகிழ்ச்சி அடைகிறேன்.
இன்றைய முதல் வாசகத்தில் எசாயா இறைவாக்கினர் வழியாக ஆகாசு மன்னனுக்கு இறைவாக்கு அறிவிக்கப்படுகிறது.
இன்றைய நற்செய்தி வாசகத்தில் அன்னை மரியாவுக்கு கபிரியேல் தூதர் வழியாக ஆண்டவரின் பிறப்பு பற்றிய செய்தி அறிவிக்கப்படுகிறது.
நாம் வாழுகின்ற இந்த காலகட்டத்தில் நமக்கும் ஆண்டவரின் வார்த்தைகள் அனுதினமும் அறிவிக்கப்படுகின்றன.
கபிரியேல் தூதரின் வார்த்தைகளைக் கேட்டு அதற்கு ஏற்ற வகையில் தன் வாழ்வை அமைத்துக் கொள்ளக் கூடியவராக அன்னைமரியா திகழ்ந்தார். தன்னை முழுவதுமாக இறைவனின் திட்டத்திற்கு கையளித்தார். யூத சமூகத்தில் பெண்களுக்கு எதிரான பல வகையான அடக்கு முறைகள் கையாளப்பட்டுக் கொண்டிருந்த சூழலில், அன்னை மரியா ஆண்டவர் மீது கொண்ட ஆழமான அன்பின் காரணமாக, சமூகத்தில் இருக்கக்கூடிய பிரச்சனைகளை எல்லாம் கண்டு அஞ்சாதவராக தன்னை முழுவதுமாக இறைவனின் திட்டத்திற்கு கையளித்து, "நான் ஆண்டவரின் அடிமை!" என தன்னைத் தாழ்த்திக் கொள்ளக் கூடியவராக இருந்தார். இந்த அன்னை மரியாவைப் போலவே நாமும் வாழ அழைக்கப்படுகிறோம்.
இறைவார்த்தை வழியாகவும் ஒவ்வொரு நாளும் இறைவன் நம்மோடு உரையாடுகிறார். உரையாடுகின்ற இறைவன் நமக்குத் தருகின்ற திட்டம் என்ன? என்பதை நாம் அறிந்து கொண்டவர்களாய் இறைவனது திட்டத்தை இம்மண்ணில் செயலாக்கப்படுத்தக்கூடிய மனிதர்களாக நாம் மாறிட இந்த நாள் நமக்கு அழைப்பு தருகிறது. வெறுமனே இறைவார்த்தையைக் கேட்டு விட்டு நகர்ந்த விடாது, நாம் இறைவார்த்தை வழியாக இறைவன் நமக்குத் தருகின்ற இன்றைய நாளுக்கான இறைவனது திட்டம் என்ன? என்பதை ஆழமாக சிந்தித்தவர்களாய்... இறைவார்த்தையின் ஒளியில் அதனைக் கண்டு கொண்டு, அத்திட்டத்திற்கு நம்மை முழுவதுமாக அர்ப்பணிக்கக் கூடிய மக்களாக நாம் மாற இந்த நாளில் நாம் ஒவ்வொருவரும் அழைக்கப்படுகிறோம்.
ஆண்டவர் இயேசு கிறிஸ்துவின் பிறப்பை ஆவலோடு எதிர்நோக்குகின்ற நாம், நம் வழியாக இறைவன் இவ்வுலகில் செய்யவிருக்கும் திட்டங்கள் என்ன என்பதை உணர்ந்து கொள்ளவும், அதனை செயலாக்கப்படுத்தவும் இறைவனது அருளை இணைந்து வேண்டுவோம்..
கருத்துகள் இல்லை:
கருத்துரையிடுக