இறைவன் இயேசுவில் அன்புக்குரியவர்களே! இன்றைய நாள் இறை வார்த்தையின் அடிப்படையில் உங்களோடு இணைந்து சிந்திப்பதில் மகிழ்ச்சி அடைகின்றேன்!
இன்றைய நற்செய்தி வாசகத்தில் ஆண்டவர் இயேசு கிறிஸ்துவின் மூதாதையர் பட்டியலை நாம் வாசிக்கின்றோம். முதல் வாசகத்தில் யாக்கோபு தனது புதல்வர்களை அழைத்து, புதல்வர்களின் எதிர்காலம் எப்படிப்பட்டதாக இருக்கும் என்பதன் அடிப்படையில், தன் ஆசிகளை அவர்களுக்கு வழங்குவதாக முதல் வாசகத்தின் வாயிலாக நாம் வாசிக்க கேட்டோம்.
இந்த வாசகங்கள் அனைத்துமே நாம் நமது முன்னோர்களை நினைவு கூற அழைப்பு விடுக்கின்றன. நாம் இந்த ஆண்டவர் இயேசு கிறிஸ்துவை ஈராயிரம் ஆண்டுகளுக்கு முன்பாக வாழ்ந்த இந்த நபரை எத்தனையோ நபர்கள் வழியாக, நாம் நமது முன்னோர் வழியாக இந்த இயேசு கிறிஸ்துவை அறிந்து இந்த இயேசுவின் வார்த்தைகளை வாழ்வாக்குவதற்கான முயற்சியில் அனுதினமும் நமது வாழ்வை நாம் அமைத்துக் கொண்டிருக்கின்றோம். இந்த நல்ல நாளிலே நமக்கு இந்த இயேசுவை அறிவித்த நபர்களை எல்லாம் நன்றியோடு நினைவு கூர்ந்து அவர்கள் விட்டுச் சென்ற அந்த ஆசிகளை எல்லாம், நம்மில் நாம் கொண்டிருக்கிறோம் என்ற நம்பிக்கையோடு, நாம் நமது செயல்களின் மூலமாக மற்றவர்களின் எதிர்காலம் சிறந்து விளங்கும் வகையில், நம்மோடு இருப்பவர்களுக்கு இயேசுவை அறிவித்து, நாம் கொண்டிருக்கின்ற ஆசிகளை அவர்களோடு பகிர்ந்து, நாளும் அவர்களது வாழ்வு ஆண்டவருக்கு உகந்த ஒரு வாழ்வாக அமைந்திட, நமது வாழ்வை நெறிப்படுத்திக் கொண்டு, மற்றவரின் வாழ்வு நெறிப்பட, நமது வாழ்வை அர்ப்பணித்திட இன்றைய நாளில் அழைக்கப்படுகின்றோம். அழைக்கும் இறைவனின் குரலுக்கு செவி கொடுத்தவர்களாய், நமது வாழ்வை ஆண்டவருக்கு உகந்த ஒரு வாழ்வாக மாற்றிக் கொள்ள, இன்றைய நாளில் இறைவனிடத்தில் அருள் வேண்டுவோம். இறைவன் தொடர்ந்து நம்மை ஆசீர்வதிப்பார்.
கருத்துகள் இல்லை:
கருத்துரையிடுக