இறைவன் இயேசுவில் அன்புக்குரியவர்களே! இன்றைய நாள் இறைவார்த்தையின் அடிப்படையில் உங்களோடு இணைந்து சிந்திப்பதில் மகிழ்ச்சி அடைகின்றேன்!
கடவுள் நாம் துன்பத்தில் வாடுகிற போது நமக்கு துணை நிற்பதற்காக பல்வேறு வான தூதர்களை அனுப்புகின்றார். எப்போதும் நமக்கு காவலாக ஒரு வான தூதர் நம்மை சுற்றி சுற்றி வருவதாக சிறு வயதில் மறைக்கல்வி ஆசிரியர்கள் சொல்லக் கேட்டிருப்போம். மண்ணில் வாழுகிற ஒவ்வொரு மனிதருக்கும் அருகாமையில் கண்ணுக்கு புலப்படாத வகையில் ஒரு காவல் தூதர் அவரைப் பாதுகாத்துக் கொண்டு இருக்கிறார் என்பதை உணர்ந்து கொள்ள இன்றைய இறைவார்த்தை நமக்கு அழைப்பு விடுக்கிறது.
இரபேல் என்ற வான தூதர் தோபித்தின் மன்றாட்டை கடவுளிடத்தில் எடுத்துச் சென்றதாகவும், அவரது மன்றாட்டுக்களுக்கு கடவுள் செவி கொடுத்து அவரது வாழ்வில் இருக்கின்ற துயரத்தை மாற்றுவதற்காக கடவுள் தன்னை அனுப்பியதாகவும் எடுத்துக் கூறுகிறார்.
தோபியாவுடன் உடன் நடந்தவர் இரபேல் வான தூதர் என்பதை அறியாத நிலையில், அவருக்கு சம்பளம் கொடுத்து அவரை அனுப்பி விடும் என்று சொல்லிய போது, இரபேல் வான தூதர், கடவுளைப் போற்றி புகழுங்கள்; நன்மை செய்யுங்கள்; நீதியை நிலை நாட்டுங்கள்; அரசருக்கு அஞ்சுவதை விட ஆண்டவருக்கு அஞ்சுவது தலைசிறந்தது என்று சொல்லக் கூடியவராக, மண்ணில் ஒரு மனிதன் எப்படி வாழ வேண்டும் என்பதை தோபித்துக்கும் தோபியாவுக்குமாக சொல்லிச் செல்லுகின்றார்.
இந்த இறை வார்த்தையின் அடிப்படையில் நமது வாழ்வை சீர்தூக்கிப் பார்க்கின்ற போது, நாம் வாழுகின்ற இந்த சமூகத்தில் எத்தனை இடர்பாடுகள், இன்னல்கள், எது வந்தாலும் கடவுள் மீதான நம்பிக்கையில் வேரூன்றியவர்களாக, நம்மால் இயன்ற நன்மைகளை ஒவ்வொரு நாளும் செய்து கொண்டே செல்லவும், பல்வேறு நன்மைகளை நமக்கு செய்யக்கூடிய கடவுளை ஒவ்வொரு நாளும் போற்றிப் புகழுகின்ற மனிதர்களாக நீங்களும் நானும் இருப்பதற்கான அழைப்பு இன்றைய இறை வார்த்தை வழியாக நமக்கு தரப்படுகிறது. இந்த இறை வார்த்தை தருகின்ற அழைப்பை இதயத்தில் இருத்திக்கொண்டு கடவுள் இது நாள் வரை நமக்குச் செய்த செயல்களுக்காக அவரைப் போற்றிப் புகழ்வோம். இறைவன் நம்மை தொடர்ந்து ஆசிர்வதிப்பார்.
கருத்துகள் இல்லை:
கருத்துரையிடுக