இறைவன் இயேசுவில் அன்புக்குரியவர்களே! இன்றைய நாள் இறைவார்த்தையின் அடிப்படையில் உங்களோடு இணைந்து சிந்திப்பதில் மகிழ்ச்சி அடைகின்றேன்!
ஆண்டவர் இயேசு கிறிஸ்து தனது பணிக்கென சீடர்களை அழைப்பதையும், தனது பணிக்கு ஆயத்தமாக்குவதையும் இன்றைய நற்செய்தி வாசகத்தின் வாயிலாக நாம் அறிந்து கொள்கின்றோம்.
ஆண்டவர் இயேசு கிறிஸ்துவின் நற்செய்தியை அறிவிக்கக்கூடிய மனிதர்களாக நாம் இருப்பதற்கு நல்லதொரு மனமாற்றம் பெற்ற மனிதர்களாக நாம் நமது வாழ்வை அமைத்துக் கொள்ள வேண்டும். மனம் மாற்றம் பெற்றவர்களாக ஆண்டவர் இயேசுவின் பணியைச் செய்ய முற்படுகிற போது நாம் ஒளியில் நடக்கின்ற மக்களாக இருப்போம்.
முதல் வாசகத்தில் வாசிக்கக் கேட்டது போல காரிருளில் நடந்து வந்த மக்கள் பேரொளியை கண்டார்கள் என்ற வார்த்தைக்கு இணங்க, இயேசுவின் வார்த்தைகளை உணர்ந்து அதனை பின்பற்றுகின்ற மனிதர்களாக நமது வாழ்வை நெறிப்படுத்திக் கொண்டு நாம் முன்னோக்கிச் செல்லுகிற போது நாமும் ஒளியில் நடக்கின்ற மனிதர்களாக இருப்போம். இந்த இயேசுவின் பாதையில் நடக்கக்கூடிய நாம் ஒவ்வொருவரும் யாரைச் சார்ந்தவர்கள் என்று எண்ணி நமக்குள் சண்டைகளையும் சச்சரவுகளையும் பிளவுகளையும் உருவாக்கக் கூடாது என்பதை இன்றைய இரண்டாவது வாசகம் நமக்கு சுட்டிக்காட்டுகிறது. நான் பவுலை சார்ந்தவன் அப்பல்லோவை சார்ந்தவன் என கொரிந்து நகர மக்கள் பிரிந்திருந்த போது, நாம் கிறிஸ்துவால் இணைக்கப்பட்டவர்கள், கிறிஸ்துவால் ஒன்றிணைந்திருக்கிறோம் என்பதை பவுலடியார் எடுத்துரைத்து அந்த மக்களிடமிருந்த பிரச்சனைகளை சரி செய்து அவர்களை ஒன்றிணைப்பதற்கான முயற்சியில் ஈடுபட்டார். இன்று நீங்களும் நானும் ஆண்டவர் இயேசுவின் வார்த்தைகளை இதயத்தில் இருத்தியவர்களாக நம்மிடம் இருக்கின்ற சின்னஞ்சிறிய தவறுகளை எல்லாம் சரி செய்து கொண்டு ஆண்டவர் இயேசுவின் பெயரால் இணைக்கப்பட்டிருக்கின்ற நாம் ஒவ்வொருவரும் ஒன்றிணைந்து மனமாற்றம் பெற்றவர்களாக இயேசுவின் பணியைச் செய்ய அழைக்கப்பட்டிருக்கிறோம் என்பதை உணர்ந்தவர்களாக நமது வாழ்வை அமைத்துக் கொள்ள இன்றைய இறை வார்த்தை நமக்கு வலியுறுத்துகிறது. இந்த வார்த்தைகளின்படி நமது வாழ்வை அமைத்துக் கொள்ள ஆற்றல் வேண்டி இன்றைய நாளில் தொடர்ந்து ஜெபிப்போம். இறைவன் தொடர்ந்து நம்மை ஆசீர்வதிப்பார்.
கருத்துகள் இல்லை:
கருத்துரையிடுக